Ամերիկայի Միացյալ Նահանգների փոխնախագահ Ջեյմս Դի Վենսը հայտարարել է, որ Հայաստանում ներդրումներ կատարող մարդիկ կարող են բավականին շահութաբեր արդյունքներ ստանալ։ Այս կարծիքը նա հայտնել է վարչապետ Նիկոլ Փաշինյանի հետ համատեղ կայացած ասուլիսի ժամանակ։
Վենսը նշել է, որ վարչապետը նույնպես շահագրգռված է գործերի արագացման գործընթացում, քանի որ տնտեսական բարգավաճումը, նրա կարծիքով, ոչ միայն ցանկալի է, այլև անհրաժեշտ է խաղաղության հաստատման համար։
«Իհարկե, Միացյալ Նահանգները կառուցողական և դրական դեր է խաղալու, բայց իմ կարծիքով՝ խնդիրը փողի բացակայության մեջ չէ։ Շատ հետաքրքրվածություն և շահագրգռվածություն կա աշխարհով մեկ»,- ասել է ԱՄՆ փոխնախագահը՝ ընդգծելով, որ ներդրողները կարող են Հայաստանում շահութաբեր գործունեություն ծավալել։
Խոսելով Նիկոլ Փաշինյանի մասին՝ Վենսը նրան նկարագրել է որպես մի անձնավորություն, որը ի վիճակի է երկարատև համագործակցություն կառուցել։ Նա նաև նշել է, որ, թեև նման գործընթացը մի օրում կատարել չի կարելի, օգոստոսի 8-ից մինչ օրս արդեն կարելի է խոսել զգալի առաջընթացի մասին։
